موقع Allah Mahabba – نيالك شربل وعقبالي
نيالك شربل لأنّك عَقَدْ ما سْكِرِتْ بالله دَوَّخِتْ عقول مؤمنين باحثين عن الحق فكتَبِتْ قصّة حب وسَرَدِتْ بحياتك الحقيقة… عقبالي أعرف إنّو حلوة مغريات العالم بس السّكِر الإيجابي ولو قَدْ ما لِفْ ودور وجَرِّب إرتوي من هون وهونيك وإشبَعْ من فلان وفليتان المصدر واحد وحيد الله وحدو.
نيالك شربل عْرِفِتْ كل يوم من إيام حياتك وبكل لحظة تِكْتُب قصّة الله، قصّة حب تْخَطِّت لبنان واخْتَرَقِتْ القلوب وجَذَبِتْ وشَغَفِتْ ورَدِّتْ نفوس ضايعة بكتابة قصص وَهْمِيّة خياليّة… عقبالي أعرِف عيش وإتذوّق لحظات هالعمر وإِغْمُس مِن حُب غير مشروط ولامحدود وإكتب قصّتي مع الله الخاصة فيي.
نيالك شربل لمّا عْرِفِتْ ترتوي من النبع، فاض هالنبع بداخلك مجاري ما عم تُنْضَب فضَوَيْت سراجك بالمَي بدل الزّيت. خُلْصو زيتاتَك وتَرَكِتْ هالدني الفانية بلا ما تتركا… عقبالي صَوِّب خطواتي نحو النبع وبطّل ملتهيّة بزيت مغشوش وخلّي سراج حياتي يضوّي شهادة لحب حَبْني وفَتَّش عنّي حتّى وُصِل في الحب لحَد الصّليب هونيك حَوَّل السّخرية والعار لخلاص وكرامة وإمتياز.
نيالك شربل كَتَبِت قصّة الله ويا الله شو شِهِد كِل حَرْف وصمت وسلوك وحدث وأثّر بأشخاص كتيرة وما وَقَّف لحظة يْأَثِّر ويْحَمِّس ويْحَفِّز ويَعْطي أمل لكل فاقد الأمل، فَرَح للحزين وصحّة جسدية ونفسيّة وروحيّة لكل مريض وحريّة لكل مسجون بهموم الدّني والآفات المستشرية بقوّة… عقبالي شربل إتعلّم منّك إنّو ما في شي مستحيل لما بْفِك حياتي من تعلّقات فارغة باهتي مُسْتَعْبِدة وبُرْبُطا وبْعَلِقا وبِدْمِجا بإله ما بيعرف المستحيل.
نيالك شربل عِشِت وخَلَّدِتْ قصّة الله وعقبالي عيش بالملء قصّة حب فريدة شخصيّة حميمة يِحْفَظا التاريخ ويْأَكِّد مِتِل ما أكَّدِت إنّو القداسة مش مستحيلة، القداسة دعوة بِقْبَلا وبترجما عَيْش وحروف بتلمع شهادة ولو تْطَلَّبِت إستشهاد يومي بْتِحْرُز وبْتِحْرُز كتير…
نيالك شربل لأنّك قصّة الله وعقبالي …
تابعوا قناتنا
https://www.youtube.com/AllahMahabbaorg
شكراً لزيارة موقعنا وقراءة “نيالك شربل وعقبالي”. ندعوك لمشاركة هذه الصورة مع أصدقائك ومتابعتنا على مواقع التواصل الإجتماعي على فيسبوك، انستغرام، يوتيوب وتويتر. نسأل الله أن يضع سلامه في قلبك أينما حللت ومهما فعلت وأن يعطيك نعمة القداسة وأن تحبّه على مثال القدّيس شربل مخلوف.
