يا ويلي شو ضيّعت وقت برّر غلط عملتو لشخص مقابيلي عم يسمع بس مُصِر إنّي غلطت وما بستحق الثّقة مرّة تانية وخلص نقطة سودا وعالسّطر
يا ويلي شو ضيّعت وقت إشرح وحاول زبِّط سوء تفاهم؛ شو كان قصدي وشو ما كان قصدي والآخر همّو بس يقنعني إنّي غلّطت كيف وليش، عن وعي أو عن غير وعي، مش مشكلتو خلص وانتهى البيان
يا ويلي شو ضيّعت وقت إشحد حب هون وهنيك، جوعاني حب، وإقبل تَسِد جوعي بفتات باقية لوَلا حدا وإقبل كون هالولا حدا بس حبّوني وآخِر همّي شو نوع الحب وغاياتو
يا ويلي شو ضيّعت وقت إستعطي إحترامي بدل ما أفرضو فرض، تنازلت وساومت على صورة ذاتي ولبست بدل القناع الواحد عشرة وميّة وألف بس احترموني وقدروني
يا ويلي شو ضيّعت وقت عم قيّم ذاتي على قد إنجازاتي مستحية إذا ما أنجزت وخايفة من نظرة الآخرين إلي ورأين فيي، وبراسي سيناريو واحد بعيد حالو بصوت داخلي صرعني بستحق وما بستحق ونسيت إنو قيمتي بذاتي بعمق أعماقي واضحة وكاملة بس عليي أعرفا، إقبلا واستثمرا
يا ويلي شو ضيّعت وقت استعطي اهتمام فلان وفلتين بدل ما اهتم بحالي
يا ويلي شو ضيّعت وقت إعتل هم الآخر وهمّي عم ياكلني من جوّا
يا ويلي شو ضيّعت وقت هربانة وقانعة حالي إنّي عم بلعب دور الخلّيص لأنّي قويّة ومن جوا حزينة ضعيفة وهشة
يا ويلي شو ضيّعت وقت غريبة ومتغربة عن حالي وقريبة من الكل
يا ويلي شو ضيّعت وقت بصمت بدل ما إحكي وقول مين أنا، مش بس بالكلام وبالعمل كمان
يا ويلي شو ضيّعت وقت زعلانة على أغلاط زغيرة، ويمكن كبيرة، عملتا بدل ما كون عم حقّق دعوتي بإنّو كون عم عيش سعيدة
يا ويلي شو ضيّعت وقت عم بستعطي حب وإحترام وتقدير، عم بتنفس مزبوط بس عايشة من قلّة الموت بدل ما كون عم لبّي دعوة بيي القدوس لعيش الحياة بملأة
يا ويلي شو ضيّعت وقت عايشة عبدة لشغلات زغيرة وعلاقات سامة بدل ما كون عم عيش بحسب دعوة الرّب إلي إنتِ بنتي وأنا مبسوط وفخور وواثق فيكِ
يا ويلي شو ضيّعت وقت خجلانة بهفوات وغلطات وخطايا عملتا بدل ما تكون دروس إتعلّم منّا وأنفض الغبرة وقوم أقوى
يا ويلي شو ضيّعت وقت وأنا عم فكّر لاي نقلّي هيك ولاي ما نقلّي هيك بدل ما كون عم فتّش على نسختي الأفضل بأمور تنميني وتنشطني، لأن نقال لي نقال وما رح ينقال لي ما نقال
يا ويلي شو ضيّعت وقت على أمور عملتا وعلى أمور ما عملتا بدل ما حط طاقتي بالأمور لي قادرة هلأ أعملا لأن لي نعمل نعمل ولي ما نعمل ما بقى ينفع حتّى لو نعمل
يا ويلي شو ضيّعت وقت عم ببني علاقات وصداقات يمكن كنت مفكرتا صداقات بدل ما كون عم ببني علاقتي بذاتي وبربّي
يا ويلي شو ضيّعت وقت عم بتململ على وقت ضاع مع أشخاص غلط وأحداث بتوجّع وأمور بتهدم وبتسمّم، بدل ما روح كل يوم للرّب وإحكي عنن يعني صليلن وكفّي حياتي
يا ويلي شو ضيّعت وقت عم فش خلقي وعم بتناقش مع فلان وعلّان، أصدقاء أو كنت مفكرتن أصدقاء عم يسمعوا لأ عم يصغوا وعم بساعدوني تلاقي الحل تكتشفت مع الوقت إنّوا عم يستعملوون ضدي
يا ويلي شو ضيّعت وقت عم بتعاطف مع الآخرين، ومع ذاتي قايم الجلد والذّنب؛ ممنوع الغلط ومش مسموح لأن لازم ومش لازم
يا ويلي شو ضيّعت وقت وأنا عم كب طاقتي بمطارح وع إشيا ما بقدر غيّرا ناطرة تصير الأمور أحسن وع ذوقي تدخّلا بحياتي بدل ما إستثمر طاقاتي وبلّش التّغيير من جوا تيترجم لبرا
يا ويلي شو ضيّعت وقت عم حاول غيّر ظروف ومراحل وأشخاص تيصيروا متل ما أنا شايفتن أحسن ولتهيت عن حالي وتغافلت عن قناعتي العميقة إنّو ما حدا بغيّر حدا لأن التّغيير قناعة وقرار الشّخص ذاتو
يا ويلي شو ضيّعت وقت عم جرب إثبت حالي وفتّش ع تصديق إنّي منيحة ونافعة وقويّة وناجحة من أشخاص ما بعرف إذا هنّي أصلًا بيعرفوا حالن من جوّا تيعرفوا غيرن ويقيموا الآخر
يا ويلي شو ضيّعت وقت غرقاني ومرتاحة بدور الضّحية؛ ما أنا هيك وأهلي هيك ربّوني وهنّي هيك عملولي … ونسيت ويمكن تناسيت إنّو جزء من الماضي صح مش مسؤوليتي بس الحاضر والمسقبل مبلا
يا ويلي شو ضيّعت وقت ناطرة شي أو حدا يتغيّر تإتغيّر ونسيت إنّو التّغيير ببلّش من جوا وبعض الأوقات ممكن يغيّر برّا بس الأكيد إنّو بغيّر نظرتي للأمور وتحليلي وعيشي وكتير إشيا
يا ويلي شو ضيّعت وقت خطّطت وحلّلت وهندست مشاريع بحياتي ولما يجد الجد إهرب وأجّل وأخّر وسلِّف تراح البكرا ولبعدو وراح من العمر كتير خايفة من الإلتزام والمسؤوليّة وهربانة من وجع المسؤوليّة
يا ويلي شو ضيّعت وقت عم حاول عبّي إديي تقدمن للرّب ونسيت إنو الرّب ما بدو منّي شي ومش ناطر أعطي شي؛ الرّب بدّو ياني وهيدا بيكفي
